摩星嶺半日遊

西環有咩打卡地點? 大多數嘅人都會同你講西環泳棚，但我話你知位於泳棚附近嘅摩星嶺亦都係西環其中一個值得去嘅打卡地點。講多無謂, 即刻介紹返關於摩星嶺既資料比你地知啦。摩星嶺係港島最西端既一個小山丘，約海拔260公尺，摩星嶺的英文名字'Mount Davis'，是以香港第二任香港總督戴維斯命名而黎 , 依到係英軍支援港島東和山下硫磺海峽既重要軍事要塞, 而係山頂就有第二次世界大戰時遺留落黎既二級歷史建築遺跡。

嗱...... 去嘅方法好簡單, 龍友們只需要起域多利道往碧瑤灣方向行就會見到依條分叉路, 沿住摩星嶺徑去向上行就啱啦。

行大概十分鐘就會見到另一條分叉路, 一條係往摩星嶺徑, 另一條係往賽馬會青年旅舍。呢個時候究竟要點揀呢? 答案就係行邊條都冇蝕底XD, 我哋首先去行摩星嶺徑果條路先, 沿摩星嶺徑行15-20分鐘即可到達另一打卡地點, 佢就係.....摩星嶺配水庫臨時花園。

摩星嶺配水庫臨時花園係隱藏係起摩星嶺食水配水庫上既大草原,由於人煙稀少,依到亦成為一個比較冷門嘅野餐地點，假日既時候一家大細走過黎野餐就啱晒啦。

依到特別的既地方在於入秋之後會有遍野芒草，仲要背山面海、黃昏景色絕對唔會比泳棚差, 影「文青相」一流啊!!! 簡直係「偽文青」福音。

起依到休息完就可以落返去下邊分叉路行上另一條路去我哋嘅終點站[摩星嶺炮台]，小編行過呢條路三次，每次沿途咩人都冇，有嘅只有山上既狗吠聲，對於每次都係得自己一個行嘅我真係有啲驚...... 提醒各位如果要行上去炮台最快都要45分鐘，所以最好帶定乾糧同埋足夠既水。行上斜路既沿途可以見到幾個樓梯口可以通往二次大戰後空置嘅廢屋，但路途比較崎嶇，建議量力而為。